hijr

ہجر

کہا کرتے تھے تم مجھ سے

محبت دائمی ہے جاں

کبھی مرتی نہیں ہے یہ

کوئی بھی روپ دھارے یہ

ہمیشہ سنگ رہتی ہے

محبت آس ہوتی ہے

شبِ تاریک میں اکثر

نویدِ صبح لاتی ہے

محبت ایک خوشبو ہے

یہ اپنے سحر میں ہم کو

ہمیشہ قید رکھتی ہے

محبت راگ جیسی ہے

کسی نغمے کی صورت میں

لبوں پہ رقص کرتی ہے

محبت ابر جیسی ہے

کسی بنجر زمیں پہ جب برستی ہے

بہاریں لوٹ آتی ہیں

کہا تو سچ ہی تھا تم نے

محبت ابر ہے جاناں

مگر اسکی طبیعت میں بہت ہی بے قراری ہے

یہ اک جا ٹک نہیں سکتی

جہاں پہ یہ برستی ہے

بہاریں لوٹ آتیں ہیں

کہا تو سچ ہی تھا تم نے

مگر پھر وقت کی گرمی نمی کو چوس لیتی ہے

محبت بھاپ بن کر اڑنے لگتی ہے

نئے بادل بناتی ہے

ہوا کے رخ بدلتے ہیں

نئے جذبے پنپتے ہیں

یہ ہجرت کرنے لگتی ہے

کسی دوجے کی چاہت میں

مگر جس جا سے جاتی ہے

وہاں پودوں کی شاخوں پر خزائیں لوٹ آتی ہیں

زمینیں خشک ہوتی ہیں

دراڑیں پڑنے لگتی ہیں

تمنا کے گلابوں پر نزع کی کیفیت بے رحم پنجوں سے مسلّط ہونے لگتی ہے

سبھی خوش رنگ امّیدوں کی ڈوریں ٹوٹ جاتی ہیں

لبوں پہ رقص کرتے راگ سارے بھول جاتے ہیں

وفا کے نام پہ قسمیں یہ سارے عہد اور پیماں

کسی شیشے کی صورت میں چٹخ کے ٹوٹ جاتے ہیں

دیے تھے ہاتھ جو ہاتھوں میں آخر چھوٹ جاتے ہیں

شبنم فردوس