Nazm_Hasil_E_Zindagi_Poet_Shabnam Firdaus

حاصلِ زندگی

وہ جب ناراض ہوتا ہے 

میں اکثر اس سے کہتی ہوں 

ہزاروں عیب ہیں مجھ میں 

تو رشتہ توڑ لو نہ تم 

مجھے پھر چھوڑ دو ناں تم 

وہ کچھ لمحے تو بالکل چپ ہو جاتا ہے 

امڈتے اشکوں کو اپنے

 چھپا کر پلکوں کے پیچھے

دبا کر درد سینے میں 

بڑے ہی پیار سے بے ربط لہجے میں

مرے ہاتھوں کو اپنے ہاتھ میں لے کر تھپکتا ہے 

وہ کہتا ہے 

دوبارہ ہجر کی باتیں نہ کرنا تم 

مرا دل ایسی باتوں سے دھڑکنا بھول جاتا ہے 

مری سانسیں اٹکتی ہیں

زمیں رکتی ہوئی معلوم ہوتی ہے 

مری جاں سوچ کر دیکھو 

کبھی ایسا جو ہو جائے 

زمیں چلنے سے رک جائے 

تباہ ہو جائے گی دنیا 

نہ دن سے رات ہو گی اور نہ کوئی رُت ہی بدلے گی 

جدھر نظریں اٹھیں گی پھر 

بیاباں دشت ہی ہو گا 

مری جاں یاد رکھنا تم 

میں زندہ ہوں فقط جو ساتھ ہے تیرا 

رہیں سانسیں مری چلتی 

ضروری پیار ہے تیرا 

میں یہ بھی جانتا ہوں جاں

ذرا ہوں تیز غصے کا 

مگر تم ہو جنوں میرا 

یہ ہے معلوم تم کو بھی 

ہو حاصل زندگی کا تم 

چلو مانا کہ تم کو چھوڑ دیتا ہوں 

میں رشتہ توڑ لیتا ہوں 

مگر بولو

مرے بن رہ سکو گی تم ؟ 

 نہ کوئی خواب ٹوٹے گا ؟

لبوں پہ درد کا نغمہ نہیں ہو گا 

میں سن کے ساری باتوں کو 

بہت حیران ہوتی ہوں 

کہ میری کیفیت سے کس قدر ہی آشنا ہے وہ 

میں سر اپنا خموشی سے لگا کر اس کے کاندھے سے 

میں آنکھیں موند لیتی ہوں 

مجھے پھر دیکھ کر یوں مسکراتا ہے 

اُسے اپنے سوالوں کے سبھی حل مل گئے جیسے

شبنم فردوس