Ghazal _ ham par tumhārī chaah kā ilzām hī to / Poet _ Faiz Ahmad Faiz

ہم پر تمہاری چاہ کا الزام ہی تو ہے

دشنام تو نہیں ہے یہ اکرام ہی تو ہے

کرتے ہیں جس پہ طعن کوئی جرم تو نہیں

شوق فضول و الفت ناکام ہی تو ہے

دل مدعی کے حرف ملامت سے شاد ہے

اے جان جاں یہ حرف ترا نام ہی تو ہے

دل ناامید تو نہیں ناکام ہی تو ہے

لمبی ہے غم کی شام مگر شام ہی تو ہے

دست فلک میں گردش تقدیر تو نہیں

دست فلک میں گردش ایام ہی تو ہے

آخر تو ایک روز کرے گی نظر وفا

وہ یار خوش خصال سر بام ہی تو ہے

بھیگی ہے رات فیضؔ غزل ابتدا کرو

وقت سرود درد کا ہنگام ہی تو ہے

فیض احمد فیض 

ham par tumhārī chaah kā ilzām hī to hai

dushnām to nahīñ hai ye ikrām hī to hai

karte haiñ jis pe ta.an koī jurm to nahīñ

shauq-e-fuzūl o ulfat-e-nākām hī to hai

dil mudda.ī ke harf-e-malāmat se shaad hai

ai jān-e-jāñ ye harf tirā naam hī to hai

dil nā-umīd to nahīñ nākām hī to hai

lambī hai ġham kī shaam magar shaam hī to hai

dast-e-falak meñ gardish-e-taqdīr to nahīñ

dast-e-falak meñ gardish-e-ayyām hī to hai

āḳhir to ek roz karegī nazar vafā

vo yār-e-ḳhush-ḳhisāl sar-e-bām hī to hai

bhīgī hai raat 'faiz' ġhazal ibtidā karo

vaqt-e-sarod dard kā hañgām hī to hai

Faiz Ahmad Faiz