Nazm ‎(نظم) ‏_Gumaan

گمان

کھڑی تھی کل جو ٹیرس پہ

فلک کو تک رہی تھی میں

 اچانک ہی نظر میری

 ہوا کے دوش پہ اڑتے سکائ لارک پر پہنچی

 اسے دیکھا ہواؤں سے جو میں نے گفتگو کرتے

  اٹھی خواہش مرے دل میں

 فضا میں سانس لوں کھل کے

 اڑوں میں بھی کبھی ایسے 

  کہ چھو لوں آسماں جاکے

 چلوں میں سنگ بادل کے

 ہوا سے گفتگو کر لوں

 ستاروں پہ قدم رکھ لوں

 میں اپنی سوچ میں گم تھی

 کہ اک آواز سے چونکی 

 پلٹ کے میں نے جو دیکھا

 ہوئی حیران میں بالکل

 کھڑی تھی رو برو میرے 

 پری صورت کوئی بچی

 چھوئی موئی سی تھی بالکل

 بنی ہو برف کی جیسے

 کہ چھولوں میں اگر آسکو

 پگھل جائے گی لمحے میں

 کہ جیسے برف سورج کی تپش پا کے بنے پانی

  سنہری کانچ سی آنکھیں

 بڑی پر نور سی آنکھیں 

  لبوں پر مسکراہٹ تھی

 کہ جیسے ہے بڑی گہری شناسائی

 سنہری ڈور کے جیسا تعلق ہو ہمارے درمیاں کوئی

  ہوئی مسحور میں ایسی

 کئی لمحے کوئی حرکت نہ کر پائی 

 بڑھایا پھر قدم میں نے

 اسے چھو کر ذرا دیکھوں

 مگر اس نے اسی لمحے

 پلک اپنی یوں جھپکائی 

 کہ جیسے کہہ رہی ہو وہ

 چلو اک گیم کھیلیں ہم

 وہی اسٹاپ ان اسٹیچو (stop n statue) بچے کھیلتے ہیں جو

   سمجھ کے بات کو اسکی

 قدم یوں رک گئے میرے

 کہ جیسے بت ہوں پتھر کی

 اسے دیکھے گئ بس میں

 اسی لمحے

 اچانک لب ہلے اسکے

 کہا پھر ماں مجھے اس نے

 مرے پتھر کے اس تن میں

 حرارت زندگی کی برق رفتاری سے یوں دوڑی

 بنا سوچے بنا سمجھے

 پکڑنا جو اسے چاہا

 زمیں پہ گر پڑی دھم سے

 نہیں تھی وہ کہیں پر بھی

 ہوا محسوس پھر مجھکو

 پری زادی جو آئی تھی

 تخیل تھی فقط میرا

 جسے برسوں سے اکثر دیکھتی ہوں خواب میں اپنے 

 حقیقت سے نہیں ہے واسطہ کوئی

مگر رشتہ انوکھا ہے

شناسائی پرانی ہے

فردوس